Ku itariki ya 23 Werurwe 2026, ibinyujije ku rubuga rwayo, nibwo Sony yatangaje ko bitewe n’ibibazo bikomeje kugaragara mu rwego rw’ubukungu ku isi, yafashe umwanzuro wo kuzamura ibiciro by’ibikoresho byayo bya PS5, PS5 Digital Edition na PS5 Pro. Ibi bikoresho by’ikoranabuhanga rigezweho, byifashishwa mu gukina imikino yo kuri mudasobwa (Games).

Ibiciro bishya biratangira gukurikizwa ku itariki ya 02 Mata 2026

“Tuzi ko ihinduka ry’ibiciro rigira ingaruka k’umuryango wacu. Nyuma y’isuzuma ryakoranywe ubwitonzi, twasanze iyi intambwe ikenewe kugira ngo tubashe gukomeza kubagezaho ibikoresho bifite ikoranabuhanga rigezweho kandi byiza”

— Itangazo Sony yanyujije k’urubuga rwayo (Ugenekereje mu Kinyarwanda)

Impamvu zateye iri zamuka

1. Izamuka ry’ibiciro by'ibikoresho byifashishwa mu gukora izi PS5

Muri iyi minsi, ibiciro by’ibikoresho byibanze mu gukora izi PS5, cyane cyane RAM(agakoresho gakora nk’ububiko) byarazamutse. Iri zamuka ryatewe ahanini nuko ibyo bikoresho bikenerwa ku bwinshi n’ibigo bikora ama porogaramu akoresha ubwenge bw’ubukorano(AI), bigatuma biba bike ku isoko.

2. Imisoro

Imisoro (tariffs) ishyirwaho n’ibihugu bikomeye nka Amerika ku bicuruzwa bitumizwa hanze ituma ibiciro by’ibikoresho by’ikoranabuhanga byiyongera ku rwego mpuzamahanga. Iyi akaba ari nayo mpamvu yari yatumye mu kwezi kwa Kanama 2025 PS5 ziyongeraho $50 muri Amerika.

3. Igabanuka rya gaze ya Helium

Iyi gaze itanzwi n’abenshi ni ingenzi cyane mu gukora Chips, udukoresho tuba mu bikoresho by’ikoranabuhanga byose (Telephone, Mudasobwa, ATM Machine, Amakarita ya banki, Imashini zo kwa muganga, Moteri,....) dutuma bibasha kumenya icyo gukora, kugikora, gukusanya amakuru, kuyabika, n’ibindi.

Icyo bisobanuye ku isoko

Ni byo, guhera ku itariki ya 2 Mata 2026, igiciro cya Sony PlayStation 5 kizazamuka ku isoko mpuzamahanga. Nubwo ibi byatewe n’impamvu zitandukanye zirimo izamuka ry’ibiciro by’ibikoresho n’ihungabana ry’amasoko, abasesenguzi bagaragaza ko ibyo bibazo bikomeje, bishobora no kugira ingaruka kubiciro by’ibindi bikoresho by’ikoranabuhanga muri rusange mu gihe kiri imbere.